Baeed

Baeed mut rakho kay ab bhi kuch namumkin sa baqi hai. Duniya say wair hai ya qismut say hai jung, baeed mut rakho kay ab bhi kuch namumkin sa baqi hai. Kehtay hain kay kal kis nay dekha hai. Mahawaratun he keh lo sahi. Per darhaqiqut  zindagi main aik thehrao aa jana wajib toh hai. Per shayud kuch kay liyay yehi haqiqut hai. So tum un main say ho jo thehrao ki talaash main dar dar bathak rahay ho aur najanay kab say yeh tum ko khud bhi maloom naheen. Toh tum toh iss baad ko gaanth baand lo ab. Baeed mut rakho kay ab bhi kuch namumkin sa baqi hai.

Bathakna bhi aik ajeeb fail hai. Insaan chunta bhi naheen per khud ko iss rah per chalta maloom pata hai. Shuru kay safar main sab naya sa hota hai so bathaknay ka ehsaas bhi dil say naheen utarta. Per phir kadum bharhatay bharhatay aik aisa waqt aata hai jab yeh ehsaas he khatum ho jata hai kay aik arsa ho gaya ab kaheen thehray. Dhoop kya, chahoun kya, sakoon kya  toh rahut kya. Akhri baar khud ko kub apnay irdgird kay nazaray dekhtay huay dheemay dheemay kadum bharhatay paya,woh toh ab yaad he naheen. Kadum uthanay ki raftaar, uss thehrao ki talaash, na janay kab say kuch itna badal gaya kay aik yeh ehsaas kay kisi cheez ko panay kay liyay uss ki taruf bharh raha hoon kab iss ehsaas main tabdeel ho gaya kay ab lugta hai jo hai paas uss say bhaagh raha hoon, kuch pata he naheen chala. Aik talaash aik azaadi ki jid-o-jehad kab bun gayee kuch pata he na chala. Raftaar itni barh gayee kay nazrain toh ab bus thehrao talaashti reh gayee aur beech main jo sab kuch dikhna chahiyeh tha, woh toh shayud dikhna he bund ho gaya, na janay kab ka.

Aur phir jab ehsaas hua kay kuch panay ki kahwish bohat kuch say bhaaghnay ki koshish bun chuki thee aur yeh sab toh khud ko bhi maloom na hua. Tub laga kay main jis thehrao ko talaashta raha woh toh kismut main tha he naheen. Balkay shayud meri zindagani ka thehrao bhi musalsal bhaaghnay main he tha. Zindagi main woh hamesha reh janay wali cheez woh araam naheen tha jis ki mujh ko talub thee. Meri zindagi main thehrao toh mera safar he tha. Shayud hota ho ga kisi kay naseeb main such main kaheen thehr jana aur uss ki zinagi ka thehrao, who cheez jo sada saath rahay, woh woh sakoon ho. Per meri zindagi ka toh thehrao, who sadabahaar hissa rehnay wali cheez, mera musalsal aagay bharhna tha. Phir iss ehsaas kay saath insaan khud ko uss safar ka he aadi bana layta hai. Per such toh hai kay baeed mut rakho kay ab bhi kuch namumkin sa baqi hai.

Baeed mut rakho kay iss musalsal safar ko jis ko tum nay apni zindagi ka thehrao maan liya hai, who yoon he chalta chalay ga. Kab iss safar main kya morh aayay, kya rukawut aayay, kismut ka oonth kis karwat baith jayay, kuch bhi toh maloom naheen. Jab tumhari zindagi main thehrao aur musalsal safar jaisi do mukhtalif cheezain aik ho sakti hain, phir aisa kya hai jo naheen ho sakta. Bus samjho kay jo ab tak hua naheen who ho sakta hai ab ho, jo ab tak hua shayud who ab na ho, yah phir who ho jo na pehlay hua aur na honay ki umeed thee, per ab shayud who tumhara aanay wala kal ho. So bus baeed mu rakho kay ab bhi kuch namumkin sa baqi hai.