Ghar ki izzat bhi kehtay ho, per khud he izzat daytay bhi naheen. Ghar ki ‘laxmi’ bhi kehtay ho, aur uss ki he ‘raksh’ bhi naheen kartay. Ghar ki amaanut bhi kehtay ho aur uss he amaanut ko khuli tujori ka naam day, uss main he khayanut bhi kertay ho. Ajab hai na, mulk toh teen hain, per rawaiyeh aik say he. Kon hai aurat? Tumharay ghar ki zeenat bhi hai aur zalalut ka nishana bhi. Muhafiz kehtay ho ussay apnay ghar kay gharoor ka. Per aankh kholti hai woh kisi ghar main, toh sharum say sir jhuk jatay hain her taruf. Uss ki he coak say janum layti hain tumhari pirhiyaan, per uss kay he janam peh afsurdah bhi hotay ho.
Bojh bhi kehtay ho ussay, aur laadhtay uss kay he nanhay kandhoun peh khud ka tamaam. Woh toh paida he samjhdaar hoti hai. Saari umar samajhna uss ka hai kaam. Per ussay kis din koi samajhta hai aakhir. Woh khamosh rehti hai. Uff tak naheen karti. Toh phir woh tumharay maashray ki riwayaat ki alumbardaar hai. Tumharay pyaar aur tawajoh ki toh tub bhi huqdaar naheen. Per jo uss nay kuch kehnay ki thaan li, toh uss ki awaaz say tumhara maashra tharthara uthta hai. Deen-o-dunya ki duhaiyaan daytay ho ussay, kay jo kaha tum nay kuch toh maangti ho apnay haqooq say kuch zada. Per uss kay kisi huq ki parwah toh tum ko na thee kabhi. Toh phir uss ka huq kya, khamosh tamashbeen bun kay rehnay ka hai, khud kay he tamashay per?
Mard jo karay so uss ki marzi. Aurat jo karay toh woh kyun kar khudgarzi? Mard karay toh woh uss kay amaal. Aurat karay toh bighaarhti hai woh tumharay maashray ka haal? Yeh kaisa tarazoo hai, kay palrha sada ka ik taruf ka he bhari. Haqooq kay naam peh, moond lay woh aankhain, bus yehi hai aarzoo tumhari? Uss kay tun ki hifazut hai deeni fariza, yeh bhi kehtay ho. Nigah daaltay uss per khud he toh ho. Yeh bhi kaho gay kay uss ko rakhna mehfooz hai mardoun ka kaam? Per aakhir kis say, tum jaisay mardoun say jo phirtay hain sir-e-aam? Toh yeh kaho na kay tum do gay tuhafuz apnay ghar ki aurtoun ko doosroun kay khilaaf. Aur woh day kar tum say, karain gay insaaf. Per bhairhyeh toh tum bhi ho, aur woh bhi. Uss kay tun aur mun peh apna huq toh dono he ho jatatay. Woh lootain gay uss ki sharum, toh tum ghar main karo gay uss ki zindagi dharum-bharum.
Hayadaar honi chahiyeh aurat. Per uss ki haya per haath daalnay walay bhi tum ho, Baqirdaar honi chahiyeh aurat. Per uss kay qirdaar ko sawaliya nishaan bananay walay bhi tum ho. Pakdamun honi chahiyeh aurat. Per uss kay damun peh daagh laganay walay bhi tum ho. Behan beti ghar ki izzat hain. Per kisi aur kay ghar ki izzat ko mitti main milanay bhi tum ho. Sab kuch honi chaiyeh ‘yeh aurat’, per khud kay baray main khayaal kya hai? Kehtay ho haya hai uss ka zewar. Per iss he zewar ko galay ka phunda bana kar utaartay bhi tum he toh ho. Lagata ho ga jo koi aur uss ki chunri main daagh. Toh tum toh ghar main he laga laytay ho aag. Aur kisa-mukhtasirun yeh hai keh ulat do in he amaal ko, toh pao gay kisi aur kay ghar kay haal ko. Wahaan ki aurat ki izzat kay dushmun ho tum. Baqi toh uss ghar kay he mard hain kaafi, sehti woh wahaan un kay haath bhi nainsaafi. Such toh yeh hai kay gar tum sab youn na ho, toh yeh na ho uss ka anjaam. Per phir bhi kehtay raho gay kay inhain mehfooz rakhna hai hamara he kaam. Muhafiz bhi tum, hifazut bhi tumharay khilaaf. Batao phir kya hai iss soch main rati bhar bhi insaaf.
Uss kay tun peh libaas kitna hai, iss say tum uss kay qirdaar ko kartay ho munsalik. Per woh jo karay tumhari nigah ko tumharay qirdaar say, toh kehtay ho nigahain toh uthain gi jahaan do gi mouqa deedar ka. Kya mouqa dayti hai woh jo dhaampti hai hijaab main? Kya mouqa dayti hai woh jo nanhi pari haya ka lafz bhi ab tak na seekhi? Per izzat toh yaksaan loot laytay ho. Aur phir zaleel bhi kartay ko kay tum izzatdaar naheen.
Tawaifoun say bharhay hain meh-khanay. Busnay wali ki wahaan hai apni apni kahani. Saudagur hai woh jo apnay wajood ki, toh batao ussay uss muqaam tak laya kon? Jjab luti thee pehli baar, toh kya di thee tum nay uss peh chadar? Kya phir say ik aam insaan mana tha ussay? Uss ki izzat luti, bhi toh tum main say he kisi kay haathoun say. Toh batao kya jatatay ho ab in baatoun say. Chadar keenchay bhi mard, kichi chadar peh ungli uthayay bhi mard. Zaleel-o-ruswa kar kay itna rakh diya, kay ab basr karnay ko zindagi, yehi zariya-e-kaar-o-baar hai uss ka. Sharum jo tum main naheen jo faida uthatay ho. Toh uss ki sharum peh uthatay ho kyun kar koi ungli? Beyizzat bhi khud ki, ab jo hai he naheen toh karay kis ki woh koi rakhwali?
Naheen karti main inkaar kay do zehun haqooq ko aik he nigah say daikhtay hain. Naheen karti main inkaar kay her insaan ka her faisla na darust. Per jab tumko hai iss ki azaadi, kay apnay amaal kay jawaabdaar ho khud. Toh mujhay kyun bairhiyoun main jakartay ho? Mujhay kyun bhairhiyoun main rakhtay ho? Jo deen ki kartay ho guftagu, toh bus yeh samjha do. Kay mumaniyut aur hidayut toh bohat si cheezoun ki hain, naheen karti main kisi say bhi ikhtilaaf. Per mard khuda ko hisaab dain gay, yeh maan kar hum kabhi kuch na kahain. Toh aurat kyun kar her roaz hisaab day mardoun ko apnay amaal ka? Na mard khuda hain, na aurat un ko jawaabday. Shirk ki bhi toh iss he deen main manahi hai.
Main kyun kar hoon tumhari izzat ki muhafiz, jab tum toh sirf meri bhi hifazut naheen kar saktay? Aur mujh ko tumharay tahafuz ki bhi zaroorat naheen, tum say he tahafuz ki toh zaroorat hai aakhir. Main hoon kyun tumharay sawaloun ka nishana, jab ghalut nighaoun ka nishana bhi hoon main. Mujh say kis cheez ki kartay ho tawako, jab meray wajood ko pinjray ki zeenat bana kay rakhtay ho tum?
Koi do auratain aik si naheen. Meri uss behan ko bhi jeenay do, jis ki duniya uss ka ghar hai. Meri uss behan ko bhi jeenay do, jo dunya main khud bana chahti ik ghar hai. Meri uss beti ko bhi jeenay do, jo khush hai uss thorhay main. Meri uss beti ko bhi jeenay do, jo sawaar hona chahti hai zindagi ki dhor kay ghorhay peh.
Deen-o-duniya ki duhai kis moun say daytay ho, jab deeni haqooq tuk say rakhtay ho mehroom. Mera khuda hai ab bhi, woh karay ga mujh say sawaal, jo daghmagayay kadum, kiyay koi ghalut aamaal. Per phir mut do deen aur maashray ka waasta tum, jab meray haqooq kay muday ko kartay ho youn gum. Kay uthaoun main ik awaaz, toh kehtay ho naheen dayta tumhain yeh zaib, meray haqooq ki pamaali bhi hai ik faraib. Meray kuch kehnay say ghar kyun tootay ga koi, batao aisi kya baat hai tum nay chupai hoi? Meri beti ko, meri behan ko, mut dikhao yeh raasta, day kar tum khuda-rasool ka waasta. Jab khud khuda ko tum bhool jatay ho, na yaad aati hai tumhain phir uss ki khudaai. Jab dum ghoathtay ho, bun baap, mian aur bhai.
Hadood toh meray bhi hain, aur hain tumharay. Phir kyun tum say toh khuda poochay ga, aur mujh say jawaab maangay saaray? Kin hadood ki baat kartay ho aur kis moun say? Jab tumhari nainsaafi ki he koi hadh naheen. Aurat ki jagah sikhatay aur dikhatay phirtay ho ussay. Jab khuda nay toh bulund khud rakha hai uss ka darja. Array deen ki ik aadhi adhoori kahani mut tum sunana ab, yeh jo ho raha hai na, sab hai uss he ka sabub. Main toh maanoun uss khuda ko jis nay mujhay banaya. aur khud hai bataya, mera farz toh mera huq kya. Tum batao iss nainsaafi ko jaiz, kehta hai kab woh rub?
Meri khamoshi ko, meri khushi mut samjho. Main kabhi khamoosh rehti hoon, kabhi ki jaati. Meri aasaishoun ko meri azaadi mut samjho, libaas toh cut-putliyoun kay bhi hotay hain deed-a-zaib. Main toh tumharay uss he maashray ka hoon hissa, jahaan ghar ki baat ghar main rakhnay ka riwaaj hai. Ghalut toh rati-bhar naheen, per uss kay ghalut istimaal ko koi naheen ilaaj. So meray zakhum jo tumko na dikhain, toh mut kaho takleef hai he naheen. Yahaan dastaan-e-zulm unginut, hain ab bhi unkahi.
Kehtay ho jo larhni hai haqooq ki jung, toh khamosh reh kar aagay bharho. Main toh utha loun apna kadum. Per jissay qaid kar rakhtay ho sonay kay pinjhray main, kya karay woh? Uss kay paas toh na azaad honay ka raasta hai, na uthnay daytay ho uss ki awaaz. Tum ko he khuda-rasool ka waasta hai, bayaan karnay do mujhay maashray kay woh raaz. Uss behan kay aur meray, kuch maslay aik say, kuch hain mukhtalif. Per na itni khudgarz bun kay reh sakoun gi, kay karoun sirf apni he baat, uthaoun akailay kadum. Main toh khamosh reh kar bhi halaat badal loun apnay, per ussay kahaan milay ga, khamoshi main koi munsif.
Meray alfaaz aur meray andaaz peh ghaur thora kum farmao. Main jo cheekh rahi hoon toh yeh batao. Main bhi hoon insaan aur khuda nay toh haqooq-ul-ibaad ko khud kay haqooq peh bhi tarjeeh di hai. Tum kaisay karo gay uss ka saamna, jab tum nay toh uss ki makhlooq kay huq ki toh sirf, paamali he ki hai. Momina main naheen toh tum konsa momin ho, mujh peh ungli uthanay say pehlay, khud ka haal toh dekh lo.
No comments:
Post a Comment