Kon Hai Woh?

Poochtay ho tum kay kon hai woh. Iss baat ka kya jawaab doon aakhir, iss kashmakash main toh dihaiyoun say mubtala main bhi hoon.

Woh ik kitaab ki manind hai, jis kay her aik punnay peh aik nayi kahani tehreer hai. Aik aisi kitaab jissay tatol tatol kar lakh baar parhnanay ka ji chahta hai. Per jissay jitni baar bhi parh loun, her baar phir ji waisay he machalta jata hai. Uss ki her kahani kay pasmanzar main kai aur kahaniyaan chuppi hoi hain. Maano jaisay jab bhi parhta hoon kuch naya he inkishaaf hota hai. Uss ki her kahani kay ikhtitaam main aik nayi shuruwaat hai. Jaisay jitni baar bhi uss kitaab ko haath say rakhnay ka khayaal bhi dil main laoun, ussay phir say parhanay ka armaan dil main jaag uthay. Main jitna bhi parh loun kuch nakaafi sa lugta hai, aur dil toh bus phir aik aur pannah bus aik aur pannah karta chala jata hai. Uss ki her kahani main aik aisi khaas baat hai jo insaan kay parhnay ka uthsa mazeed barha day, youn kay bus maano meri raatoun ki neend lay urhi ho. Faqt chain toh ab bus uss kay her aik lafz main kho janay main hai.

Woh aik tasveer hai, jissay kisi naqaash nay bohat hi itminaan say waqt lay kar banaya ho. Jaisay uss main istimaal her rung main uss ka khud ka aik rung ghula hua ho. Jaisay her rung main maano uss ki hasti ki aik chavi ho. Jaisay her rung uss ki he dastaan ko bayaan kar raha ho. Aik aisi tasveer jissay barhi fursat say banaya gaya hai, dili sakoon milay jissay taktay taktay. Aik aisi tasveer jis ki kashish nighahoun ko khud uss ka aseer kar day. Dil peh kuch jaadu aisa chal jayay kay nazrain na hut payain. Ghantoun bhi jis kay peechay ki kahani ho samajhnay main beet jayain toh ghum naheen. Nayaab hai woh, keemati bhi. Aisi kay uss ki keemat ka andaza bhi na laga sako kay phir jis nay banaya hai, uss naqaash ki gallery ki sab say baish qeemat cheez bun kay reh jayay woh. Saji kuch aisay pus apni deewaar peh kay sadiyoun tak loag door door say deedaar karnay ko he uss ka aayain.

Woh aik madhum si sureeli si dhun hai. Aisi kay jis ka rus kaanoun main ghultay he dil baagh baagh ho jayay. Aisi kay jis say her din ki shuruwaat aur her raat ka iktitaam karnay ko ji chahay. Aik aisi dhun jo pehli baar main he dil main utar jayay, aur bus phir tab say abad tak uss ko sunana aik aadut si bun jayay. Jaisay din na guzray uss ko sunay bina, raat na beetay uss dhun ki aagosh main soyay baghair. Saaz aur awaaz ka aisa taal-mail keh lo ussay kay jitna bhi suno, lagay kay her baar kuch naya raag alaap rahi ho, jis ki chashni kaanoun ko bhali maloom ho.

Woh aik khayaal hai. Aik aisa khoobsurat khayaal jo lamhoun main dil main ghar kar lay. Jis main baykauf hou kar dil-o-dimaagh say khonay ki tamana jaag uthay. Aik aisa khushgawaar khayaal kay bus uss main khonay ko he ganeemut jaano tum.

Shayarana khwaab hai woh,
Beyhadh nayaab hai woh,
Ghazal sa uss hai jis ka badan,
Khiltay phooloun sa maano mun,
Rangoun ki aik aisi paheli kaho,
Ya kahanioun ka majhmuah,
Aseer ho gaya hoon pus ab us ka,
Aisa hai uss nay dil ko chuah... 

Muskurahut

Ajeeb si baat hai. Kitnay bhi bund bhaandh lo, kuch cheezoun ko behnay say rokna itna asaan naheen hota. Phir woh jazbaat main khud ka beh jaana ho ya jazbaat ka aankhoun say behna. Dono he bina batayay behtay hain aur insaan kuch kar naheen sakta.

Kabhi kabhi hum jazbaat main kuch itna beh jatay hain kay waqt say, loagoon say, zindagi say aur kismut say...sab say he kuch zada umeedain laga baithtay hain. Jaantay bhi hain kay yeh khud kay liyay sahi naheen. Per khud ko rok naheen patay. Yeh sab aagay barh jatay hain aur hum kaheen peechay chooth jatay hain. Jaisay mano rail garhi nikal parhi ho aur musafir kaheen peechay reh jayay. Woh station per kharha chilata rehta hai per uss ki awaaz tak kisi ko sunai naheen dayti. Woh haath hilata reh jata hai per rail garhi kay driver ka dhayaan toh kaheen aur he hota hai. Mutwajah hotay hain toh woh chandh loag jo musafir kay irdgird kharhay hotay hain. Per un main aur tamaashbeenoun main kuch zada farq naheen hota.

Bus hum main aur uss musafir main aik farq hota hai. Ussay toh uss ki manzil tak uss he rail garhi nay pohanchana hai. Per hum shayud apni rail garhi kay musafir he naheen. Jis ki hamain lugta hai hamain talaash hai woh shayud hamari manzil he naheen. Yeh baat samajhnay main bohat dair lug jaati hai aur tub tak cheekh cheekh kar gala sookh chuka hota hai. Uss rail garhi kay peechay bhaaghtay bhaaghtay pairoun main chalay ho chukay hotay hain. Saans phool chuki hoti hai. Aur uss khulay aasmaan talay bhi dum ghut raha hota hai. Aur aankhoun say beh janay walay jazbaat alug.

Rail garhi toh wapis aani naheen, so insaan aagay barhnay ki koshish bhi kabhi na kabhi toh karta hai. Bus aagay barhna itna asaan naheen hota. Khaas taur peh tub jab woh zindagi ki pehli ya doosri rail garhi naheen balkay itnaween ho kay ab toh ginnay kay liyay haath bhi na-kafi say lugtay hain. Phir insaan ya toh baar baar jazbaat main behta jata hai ya tung aa kar iss dar say kay kaheen ab jazbaat main na beh jaoun, khud ko aur apnay ehsaasaat ko aik dibay main bund kar layta hai. Dil hai, mehsoos toh phir bhi karay ga, per insaan uss kay izhaar ko ghairmumkin kar dayta hai. Aur iss sab main woh theek ho ya na ho per apnay irdgird sab ko yeh yakeen dilanay main kay sab theek hai aik zaroorat say zada barhi muskurahut pehnay phirta hai. Per jazbaat ko maar toh sakta naheen. So woh kab kahaan kaisay beh jayain yeh uss ko bhi maloom naheen.

Phir ya toh woh un motiyoun ko palkoun main samait layta hai aur behnay naheen dayta. Ya kuch iss tarhaan jhatak dayta hai iss dar say kay koi daikh na lay. Aur such main daikhta toh koi bhi naheen hai. Bus uss kay tanha honay ki dair hoti hai. Phir woh aisay zaar-o-qataar behtay hain kay moun ki awaaz toh shayud haath rok lay aur uss ki siski ki goonjh koi na sunay, per kuch bhi un aansoun ko naheen rok pata. Kuch chothi si bhi baat jo uss rail garhi ki yaad diladay, un aansoun kay liyay bulaway ki manind hoti hai. Aur insaan toh bus un ko samaytay phir say tanhai ka intizaar karta hai, keh thora toh inhain behnay doun. Shayud kuch behtar lagay. Per bus lugta naheen. Kyun kay insaan aagay toh barh sakta hai per apnay maazi ko chorh naheen sakta.

Pata naheen zindagi main umeed lagana ghalut hai ya na chorhna ghalut. Per kabhi kabhi lugta hai kay yeh toh bohat aam si umeed thee. Umeed bhi naheen, yeh toh woh khushi thee jo sab ki he hoti hai. Main koi mukhtalif toh naheen. Bus shayud meri umeed na poori hona kuch mukhtalif hai. So apna samaan uthayay chal musafir. Takleef toh ho gee. Kya karain...ho ga toh wohi jo manzoor-e-khuda ho ga, kuch toh milay ga toh kuch toh juda ho ga. Tu muskuratay huay bus yeh yaad rakh. Zindagi main jitni barhi mussibut, utni barhi rakho muskurahut. Dard kum toh naheen ho ga, per lumhay bhar ko he sahi zehun peh kuch aur sawaar ho ga, chahay waqti khushi he. Kon janay kitna waqt hai apnay paas. Jitna hai, muskuranay ki koshish karo. Kya pata lumhay bhar kay liyay he, tum phir say dil say khush ho jao.

Khamoshi

Khamoshi. Khamoshi main bhi ab kuch khamoshi ki kami si ho gayi hai. Jaisay sunatay bhi ab kuch keh rahay hain. Tareeki main jaisay aik roshni ki kiran dikh jayay, waisay naheen. Waisay naheen, balkay bheerh main bhi insaan tanha sa ho, kuch waisay.

Jaisay mano jo sama khamoosh hona chahiyeh, woh ab naheen raha. Aur iss ehsaas say dil ko rahut naheen mil rahi ab. Dil toh baytaab hai khamoshi kay lautnay ko. Per khamoshi main ab khamoshi he naheen rahi.

Sunatay main bhi iss qadar shor hai, kay kaanoun main awaaz toh koi bhi naheen aa rahi per phir bhi shor bahut sunai day raha hai. Na janay kab say aisa honay laga. Per ab lugta hai kai arsa ho gaya khamoshi ko mehsoos kiyay.

Kuch youn maan lo jaisay zehun nay kaanoun say sunni hoi her awaaz ko qaid kar liya ho. Jaisay kisi ki her kahi baat ko mehfooz kar kay aik konay main chuppa liya ho. Kab aur kaisay aisa hua maloom naheen. Per jab aas paas ki bheerh kum ho jati hai, jab lugta hai kay ab irdgird sunata teharnay wala hai, tab hi dimaagh kay qaidkhanoun say sab azaad honay lugta hai, aur khud ki azaadi un sab main qaid.

Jaisay sab kay jatay he shor kum naheen badal sa jata hai. Faruq hai toh bus ab meri khud ki khamoshi ka. Sab kay shor main meray moun say bhi kuch toh awaaz nikal he jaati thee, aur sab uss say koi myni nikaal laytay thay. Ab iss khamoshi main jo shor hai, uss main ya toh meri awaaz dub si jaati hai, ya nikalti he naheen. Aur agar nikal bhi jayay toh ab uss say myni naheen nikaal sakta koi. Kyun kay laboun say nikalnay wali awaazain ab alfaaz naheen, sisakna bun kay nikalti hain. Aur uss khamoshi main bassay shor main ab aur izaafa ho gaya hai. Sab ki un awaazoun main, un alfaazoun nay, jinhoun nay meray dil-o-damaagh aur kaanoun main ghar kar liya hai, ab aik shor aur hai. Mera shor. Mera jawab ka shor. Aur yeh uss sunatay ko bilkul tehusnehus kar kay rakh dayta hai. Kyun kay khamoshi main busnay wala shor jo mujhay sunai dayta tha, woh toh farzi tha, per mera jawaabi shor farzi naheen.

Mera khamosh sama ab puri tarhaan tabah ho raha hai. Aur iss shor ki khabar ab sirf mujhay naheen balkay doosroun ko bhi ho rahi hai. Aur yeh sab ab mujh ko gawara naheen. Khayalaat, ehsasaat aur yeh shor, sab meray zehun ki dunya say ab bahir aa rahay hain yeh mujh ko gawara naheen. Kyun kay jo shor mujh ko sunai day raha tha, uss say sirf meri zaat he hil si jaati thee, meri nighahain irggird dhornay lugti theen. Per ab jis shor ki wajah na chahtay huay bhi loag meri zaat ki taruf mutwajah ho rahay hain.

Mujhay toh woh khamoshi bahut azeez hai, mujhay lautana hai ussay per ab itnay shor main dimaagh kuch samajh naheen suk raha kay kya karay. Per mujhay woh khamoshi wapis chahiyeh. Mujhay meri khamoshi wapis chahiyeh. Ab ya toh main khud ki awaazoun ko haathoun say daba loun, ya zehun main busnay wali awaazoun ko bhula doun. Un awaazoun say azaadi hasil karna iss qadar asaan toh naheen. So ab khud kay haathoun ko he istimaal main lana parhay ga. Ya toh meri khamoshi ka ilaaj un awaazoun ko qaid karnay ki koshish karna hai, ya mustakil tor peh meri her awaaz ko khamosh kar dayna hai. Aik, aik raasta aur bhi hai, iss sab shor ko jhail kar aagay bharhtay jana. Ab tak toh uss ko apnanay ki he koshish ho rahi hai. Waqtun fawaqtun haath phir say istimaal main aa jatay hain, per phir himmut baandh aagay barhnay ka raasta dikhta hai aur sab thora sa asaan ho jata hai. Bus ab yeh himmut baqi reh jayay toh sab theek, warna haath toh ab dil-o-dimaagh ki na sun kar mustaqil tor peh sab khamosh kar he saktay hain. Per abhi naheen. Khamoshi main khamoshi laut janay ki ab bhi kuch toh umeed baqi hai, kuch toh dil ki tamanah baqi hai, kuch umeed ki kiran ka asur kuch soch ka kehlo, per khamoshi kay lautnay kay liyay meri koshish ab bhi baqi hai. Per kab tak? Mujh ko bhi maloom naheen.

Paigham-e-Dil

" Aik aisi he sard shaam main, hum nay aap ko chaandh ko taktay daikha tha. Maloom toh yeh tak na tha kay kis naam say aap ko pukarain. Per phir bhi dil ko yeh maloom ho chuka tha kay agar koi shakhs hai jis kay saath hum yoon he aik chaandni raat ko chaadar orhay, palkoun ko jhukayeh, baarish kay baad geeli mitti ki uss dheemi si khushboo ko apni saansoun kay saath ghulnay daina chahtay thay, toh woh aap hoon gee.

Woh pehli baar na tha jab hum nay aap ko daikha tha. Aap ko jaantay toh hum pehlay say thay. Bus kabhi himmut na hoi thee aap say kuch kehnay ki. Aap ki tarhaan hum bhi kabhi kabhi wahaan shamain bitanay aatay thay, bus aik baar yoon he aap dikh gayee theen. Afsurda maloom hoti theen. Aur najanay kyun anjaanay main he sahi per uss lumhay dil kiya tha kay aap kay chehray peh aik muskurahut lay aayain.

Uss raat aap ko aap ki saheli lenay aai theen, aur aap ka chehra aisay khil utha tha jaisay mano kuch bhi na hua ho. Uss waqt hum nay iss baat ko darguzar kar diya tha. Per phir waqt kay saath maloom hua, yeh aap ki aadut thee, apnay ehsasaat ko apnay aap tak rakhna.

Mausum badalta raha, aur hamaray aanay kay maqasid bhi. Hum nay uss khamosh wadi ko canvas peh rangoun ko bakhairnay kay liyay sahi jaga samjha, toh aap nay kitaboun ko tatolnay kay liyay.

Ajab si baat hai, jo din hamaray liyay bura maloom hona chahiyay tha, woh hamara ab tak ka sab say acha din bun gaya. Achanuk say aanay walay badaloun nay hamaray canvas aur aap ki diary, dono peh rangoun aur siyahi ko pehla diya tha. Hum dono peechay cottage ki taruf bhaaghay, per khud geelay honay ki zara bhi fikar na thee, thee toh apna kaam kharaab honay ki. Per uss din pehli baar aap nay hum say baat ki. Aur phir uss shaam kay baad, kabhi chai kay cup peh toh kabhi coffee ki chuski peh, hum dono aik doosray ko jaananay lagay.

Aap shayud siraf iss baat ka lihaaz kar rahi theen kay baarish ki uss shaam hum nay aap ki kharaab garhi ko theek kiya tha. Per hamain acha laga. Chalo iss he bahanay, aap nay hum say baat toh ki. Maloom chala kay humari tarhaan aap bhi din main toh dafatir main he masroof rehti theen, aur yeh aap ka shaam bitanay ka mashghala tha. Kabhi parhti toh kabhi likhti, jaisay hum kabhi camera main toh kabhi canvas peh, khoobsurati ko qaid kartay thay.

Hum dost banay aur aahista aahista aik doosray ko itna jaananay lagay keh hum kaisay milay, yeh shayud zaroori bhi na raha. Aaj daikhiyay, jaan pehchaan ko do saal ho chukay hain. Ab lugta hai kay ab na kaha toh shayud kabhi na keh paoun ga. Mohtarma kehtay hain kay saathi kuch apna sa lagay, kuch apnay jaisa lagay, toh raastay asaan, rahain roshan, aur zindagi gulzar si ho jati hai. Jitna hum nay aap ko jana hai, mukamul toh naheen, per yeh maananay kay liyay kaafi hai kay aap ab kuch apni si bhi lugti hain, aur kuch apnay jaisi bhi. Phir agar hum yeh kahain kay hum aap kay saath chalnay ki aarzoo kartay hain, toh kya aap bhi zindagi kay iss taveel safar ko saath kaatna chahain gee? Hum jaantay hain kay aap soch rahi hoon gee aap kyun? Hum aap kay baray main bohat kuch ab bhi naheen jaantay... Per uss kay liyay toh tamaam zindagi parhi hai. Aap say mutasir honay kay liyay jitna jaantay hain, utna kaafi hai. Aur raha sawaal aap ka, kay aap kyun? Shayud kuch ehsasaat na hum kisi canvas ki zeenut bana saktay hain, aur na aap kaheen qalumband kar sakti hoon gee. Kuch youn he haal-e-dil bhi samajh lijiyeh. Jawaab haan ho toh palut kay muskura dee jiyeh ga, na ho toh qadum hum say door lay jayiyeh ga. Aur sada khush rahiyay ga. Udaasi ab bhi aksar aap kay chehray peh chah jaati hai, wajah hum ko maloom ab bhi naheen. Per jo bhi hai, dil chahta hai kay ussay qaid kar lain, aap say door, bohat door.

Mastana Musawir "

Kaghaz ko paluttay uss nay phir say lafafay main rakha. Shayud meray qadmoun ki aahut thee kay woh jhut say palti. Chehray kay tasuraat kuch aisay thay, kay kuch bhi kehna aasaan na tha. Woh yoon he meri ore barhi, per nigah ka markaz main naheen, kuch aur tha. Meri nazrain uss he par tehri hoi theen.

Meray barabur aatay woh kuch aahista say qadum uthanay lagi, aur shayud darhkun bhi ab kuch utni he aahista ho rahi thee. Dimaagh haan hai ya na hai ki jung larh raha tha, per saath say guzartay guzartay he bus woh palut kar meri taruf daikhnay lagi. Haath say chai ka cup liya aur palkain jhuka kar aik chuski li. Phir boli. "Chai achi hai, per kal aap ko main aik alug tarhaan ki chai chakhaoun gi." Mera moun kuch khula ka khula sa reh gaya, per alfaaz na niklay. Iss masoom dil ki haalut daikh, woh hansnay lagi aur main uss ki muskurahut ko daikh muskuranay laga. Chai ki aik chuski li toh poocha. "Iss main cheeni daalna reh gai, aap boleen kyun naheen." Woh hulka sa muskura kar boli, "kahaan, mujhay toh aaj chai aur bhi meethi lagi". Pehlay toh hum kuch hakay bakay reh gayay, per phir shayud kuch samajh main aa gaya. Shayud such he tha, aaj ki chai, wakayee roz say zada meethi thee.

Tanhai

Akailapun bhi kya khoob hai. Tanhai toh maano aankh kholnay say aankh mooundnay tak ki saathi thehar chuki hai. Khokla sa karnay ki taqut bhi rakhti. Rahut ka samaan bhi bun jati hai. Iss khamoshi main mano khud ko paana bhi seekha hai aur sab kho kar khud ko khona bhi hai aaya.

Gilah bhi hai iss say, shikwa bhi hai iss say, saza bhi hai iss say toh mano maza bhi hai iss say. Dost yar hum ko bananay aatay naheen. Rishtay hain say nibhayay jaatay naheen. Saathi toh kismut ki lakeeroon main hai he naheen. Aur khamosh lumhay hum ko bhatay naheen. Jo chundh hum rahi hain un peh kartay hain youn jaan nisaar, kay phir na jawaabi ehsasaat honay kay bahanay bhi samajh aatay naheen. Aitabaar toh khair ab sab say he uth chuka hai kuch aisa kay shayud koi koshish bhi karay toh khud ko bhaaghta paoun. Dil behlanay ko shayud khayaal yehi acha hai kyun kay koshish kay layuk hum toh kabhi thay he naheen.

Unginut raabtoon ka shauq na kabhi tha, na kabhi ho ga. Hum toh azeez-o-aqarub ki chothi mehfil sajanay kay qail hain ji. Per afsoos azeez bhi un jangalon main bastay hain jin ka raasta hum ko ab yaad naheen hai rakhna. Phir shikwa karain kis say? Khuda peh toh imaan dughmughanay say raha. Imtihaan bhi lay raha hai gar woh toh uss ka yeh banda pashtanay say raha. Log peetay hain ghum bhulanay ko, hum choohtay naheen ussay jis ki ho manahi. Naheen chahiyeh koi yar, rishtadaar, humrahi. Hum ko kaafi hai hamari yeh tanhai.

Bheeghnay do panoun ko, ab naheen sunana kisi ko dil ka haal. Hai yeh itni bhi barhi kya? Kay hotay ho youn bayhaal. Jab sunanay walay nay zakhum naheen daikhnay aur haath naheen hai thaamna, phir kyun karain ussay sunatay waqt barbaad. Rehnay daytay hain iss daastan-e-qaid ko andhairon azaad. Mana kay koi na saath tha, na hai, na ho ga. Per ab aur kar bhi kya saktay hain. Rona bhi ab toh aata naheen hai. Aao chalo bund muthi ko khol, khul kay hanstay hain. Dar bhi lugta hai kay ik din yehi khamoshi khamosh na kara day, per shayud ab aisay he sakoon naseeb ho, so banatay hain iss dar ko dua. Muskura kay haath jorh rihai kay he talubgaar bun jatay hain, aisay he jaan main jaan phir laatay hain.

Gulaab

Aainay kay saamnay kharhi woh apnay aap say kuch barhbarahe ja rahi thee. Uss kay shikwoun main bhi aik ajab se maasoomiyut thee kay un teekhay alfaazoun main bhi maano jaisay aik rus ghula hua tha, kuch bepanah pyaar sa. Uss kay andaaz-e-bayaan peh ghaur karoun, ya uss ki un baatoun kay peeche chupe jazbaat ko zada ehmiyut doon? Garum mizaaji toh uss ki shakhsiyut ka bhi hissa thee aur meri bhi. Per phir bhi jab woh ghusse main bhinbinati thee na, maano uss peh aur pyaar aa jata tha. Kuch aisi he thee meri biwi, kuch aisa he tha uss ka pyaar. Qararay alfaaz main, sulaghte andaaz main, lipta hua woh naik dil sa ehsaas. Sab kehtay thay kay ussay sambhaalna aasaan naheen, per main maanta hoon ussay samajhna aasaan naheen. Per main toh ussay samajh chuka tha, iss qadar kay rufta rufta bus uss ki he taruf khicha chala jata tha. Kuch aisi he toh kasish thee uss ki. Aur phir main khud bhi toh kuch aisa he tha. Shayud iss he liyay woh baat hamaray liyay sahi bhi thee, kay hum bilkul aik doosray kay liyay he banay thay.

Woh kharhi abhi bhi apnay baal sehla rahi thee. Sajnay sawarnay ka shauq ussay na kuch zada tha, na kuch kum, per mujh say poocho toh duniya ki koi bhi cheez uss ki khoobsurati ko uss ki khud ki muskurahut say zada naheen nikhaar sakti thee.

Apnay jhumkay ko theek karti hoi woh meri taruf palti. "Aap meri sun bhi rahay hain ya naheen? Main kab say bolay chali ja rahi hoon." Such kahoon toh woh jab bhi youn taiyaar ho rahi hoti thee aur main peechay bistar kay paas khara uss ki chavi ko tak raha hota tha, main kabhi kabhi iss qadar kho jata tha kay woh kya keh rahi hoti thee na uss ka hosh rehta, na waqt ka.

Iss say pehlay kay woh mazeed ghussa hoti main bol parha. "Array begum sahiba iss nacheez ki itni majaal kay aap ki baat na sunay. Woh toh hum bus kuch khamosh thay kyun kay aap ki awaaz kaanoun main amrit ki tarhaan jo ghul rahi thee."

Uss ki bhavain aik dum say upar gaieen jaisay uss nay meri baat maanay say saaf inkaar kar diya ho. Phir woh jhat say murhi aur apnay kangun pehntay huay boli "jaiyeh aap bhi mera mazaaq urah rahay hain na? Itni dair say toh chila rahi hoon main aur aap meri awaaz ki khili urah rahay hain."

Mainay do teen qadum aagay barhayeh aur uss kay saath ja kar kharah ho gaiya. Uss kay kandhay peh aik baar hulka sa haath lagaya, woh zara na khiski. Mainay aik baar aur lagaya par woh tus say mus na hoi. Ab jo teesri baar mainay haath rakha toh woh aik dum say palti per kuch kehtay kehtay chup ho gai. Uss ki palkoun peh chandh motay motay aansoun nay basayra kar liya tha ab tak.

"Yeh phool?" "Aap kay liyay hai, aik gulaab meray chaandh kay liyay." Uss ki palkoun peh sajay woh aansoun ab uss kay gaaloun kay saath lug kar neechay siraknay lagay per waqt rehtay meray haath nay unhain behnay say rok diya. Uss nay aik haath say meray haath ko thaam mujh say gulaab liya aur doosray say meray seenay say lug kar mujhay jakar liya. "Mera muqsad aap ko tung karnay ka nahi tha, main toh bus..." "Mera acha he sochnay ki koshish karti ho? Jaanta hoon. Per kabhi kabhi na kabhi toh insaan ko kuch aazmaishoun say guzarna parhta hai na?" Meray baazo kay neechay sir chupai hoi woh dabi saans kay neechay haan boli.

"Main jaanta hoon tum sirf mera bhala chahti ho. Main bhi aap say itni kya, iss say kaheen zada mohabbat karta hoon mohtarma." Woh seedhi hoi aur meri aankhoun main aankhain daal kar boli "jaanti hoon". "Main bhi jaanta hoon. Hum nay hamesha aik doosray ka haath thaamay waqt aur haalaat say larhnay ki qasam khai thee na begum, bus woh yaad rakhiyay ga. Jab tak hum saath hain, hamaray saath ki taqat her mushkil peh bhari parhay gi. Bus Khuda hum par apna karum banayay rakhay. Ameen." "Ameen" Woh muskurai aur phir se meray galay lug gai.

Ik Pannah

Shaam dhalnay ko thee aur mehmaan sab hamara he intizaar kar rahe thay. Ajab baat hai na, aaj ka jashn hamari taruf se tha aur hum he waqt peh na ponchtay, kuch aisa he aalum lug raha tha.

Baaloun ko sehlati hoi woh chat se gusal khane se bahir aai jaise achanuk he khayaal aaya ho k dair ho rahi hai. Hamesha ki tarhaan apni zulfoun ko lehrati hoi ghoomti vi woh aaine k saamnay ja baithi. Main? Main toh haath main jo kitaab thee uss say nazrain churate churate usse takta raha, per na jane kub hosh na raha aur nazrain uss he peh tehar gai.

Jhuki nazroun say apne haathoun main kangan ko sajati woh aik dum se boli. "Hmm 5 saal ho gai Khan sahub, kuch na badla toh aap ka mujhe youn daikhna jaise aap ki nai naveli dulhan hoon."

Harhbarha k mere haath se kitaab aur uss k laboun se hansi chothi. Maine kitaab sirhane peh rakhi aur uss ki taruf kadum barhaya. Uss k peeche ja k ruk gaiya aur haath bande aaine main uss ki chavi ko takta raha. Apne kaanoun main kaante daalti hoi woh aik dum se ruki aur aaine main meri chavi ko dekh muskura kar boli. "Phir tehr gai aap aur ap k chehre peh tehr gai yeh muskurahut?" Aaine main hamari nuzre mili aur hamesha ki tarhan muskurate muskurate woh halka sa sharmai.

Maine jhuk kar uss k haathoun se haar thaam liya. Uss ne apni zulfoun ko aik taruf jhatka aur maine uss k haar ko dheere se uss k tun peh sajne ki zehmut bakshi, aur uss k kandhoun peh haath rakhte hue, uss k gaal peh apne laboun ka ehsaas chorh diya. Woh phir se sharma k nazre churane lagi aur maine mouqa ka sahi istimaal jan kar uss ka haath tham usse kuch youn ghuma k uthaya k uss ko dono haath mere bazuoun peh aa tehre aur mere uss ki qamar k gird. "Kash waqt bhi tehr jata mohtarma, 5 saal toh beet gai per na toh ap ka yeh na cheez shohar aapke sehar k asar say bahar aa saka, aur na uss ki biwi nay nai naveli dulhan ki tarhaan sharmana bund kiya." Jhuke nazroun se woh phir muskai. Uss ki peshani ko choomte hue maine ussay apni baahoun main lay liya.

Woh aik dum se peeche hoi aur boli "aree hathiye, pehle he bauhat dair ho gai hai hamain". Uss kay laal gaaloun ko dekh meri hansi chooth gai. "Hum se poochain na toh ap itni khoobsurat hain k ap ko sujne ki zaroorat he nahi, aur na he hamain kaheen jane ki." Yeh kehte hue maine phir uss k kareeb aane ki koshish ki per woh jhat se hanste hue meri baahoun k neeche se ja bhagi kehte hue "main apni chapal dhoondhne ja rahi hoon, agar aap ko fursat milay bey-waqt k ishq k izhaar se toh khane k intizaamaat ka maloom kar lain. Agar ap ko yaad ho toh yeh dawat hamari shadi ki salgirah ki hai, yeh kaam hamara hai." Yeh keh kar woh kumre se nikli aur main peeche se "jo hukam aap ka begum sahiba" kehte reh gaya.

5 saal toh beet gai begum per ap aaj bhi waisi he hain, kaash aisi he rahe, aur hamara pyaar bhi.

Kora Kaghaz

This is an archive for my Wattpad work by the same name.
Updates will be posted on both places.